ប៉ាគីស្ថាន៖ គណបក្សនយោបាយធំៗពីររបស់ប៉ាគីស្ថានបានប្រកាសពីការឈានដល់កិច្ចព្រមព្រៀងជាផ្លូវការដើម្បីបង្កើតរដ្ឋាភិបាលចម្រុះ ដែលជាការបញ្ចប់ការចរចាដ៏តឹងតែងដែលបានអូសបន្លាយពេលជាង ១០ថ្ងៃ  ក្រោយលទ្ធផលបោះឆ្នោតជាតិផ្លូវការរបស់ប៉ាគីស្ថាន ពុំមានគណបក្សណាមួយដែលទទួលបានសំឡេងភាគច្រើនដាច់ខាតសម្រាប់បង្កើតរដ្ឋាភិបាលថ្មី។ 

កិច្ចព្រមព្រៀងរវាងគណបក្សប្រជាជនប៉ាគីស្ថាន (PPP) របស់លោក Bhutto Zardari និងគណបក្សសម្ព័ន្ធ Muslim-Nawaz (PML-N) របស់នាយករដ្ឋមន្ត្រី ៣អាណត្តិ លោក Nawaz Sharif បានឈានដល់ការឯកភាពគ្នា និងបញ្ចប់ភាពជាប់គាំងនៃការបង្កើតរដ្ឋាភិបាលថ្មី ពោលគឺចាប់តាំងពីក្រោយការបោះឆ្នោតជាតិនៅថ្ងៃទី៨ ខែកុម្ភៈ ដែលបណ្ដាលឱ្យសភាជាតិប៉ាគីស្ថានក៏ជាប់គាំងផងដែរ។ 

លោក Bhutto Zardari បានបញ្ជាក់នៅក្នុងសន្និសីទសារព័ត៌មានកាលពីយប់មិញនារដ្ឋធានី Islamabad ថាអតីតនាយករដ្ឋមន្ត្រី Shehbaz Sharif ដែលមានវត្តមាននៅក្បែរគ្នានោះ នឹងក្លាយជាបេក្ខភាពឈរឈ្មោះសម្រាប់ការប្រជែងតំណែងនាយករដ្ឋមន្ត្រីតំណាងឱ្យរដ្ឋាភិបាលចម្រុះរបស់លោក។ លោកបន្ថែមថា ដោយឡែកចំពោះឪពុករបស់លោក Bhutto ​គឺលោក Asif Ali Zardari នឹង​ក្លាយ​ជា​បេក្ខភាព​របស់សម្ព័ន្ធភាពដើម្បីប្រជែងតំណែង​ប្រធានាធិបតីផងដែរ។

ដោយឡែក លោក Shehbaz Sharif ដែលជាប្អូនប្រុសលោក Nawaz Sharif បានថ្លែងថា គណបក្សទាំងពីរមានសំឡេងគ្រប់គ្រាន់សម្រាប់បង្កើតរដ្ឋាភិបាល ព្រមទាំងមានការគាំទ្រពីគណបក្សតូចៗផ្សេងទៀតផងដែរ។ គួរឱ្យដឹងថា គណបក្សសម្ព័ន្ធម៉ូស្លីម Muslim-Nawaz (PML-N) ទទួលបានសំឡេងគាំទ្រស្មើនឹង ៧៩អាសនៈ ខណៈគណបក្សប្រជាជនប៉ាគីស្ថានទទួលបានសំឡេងគាំទ្រ ៥៤អាសនៈ ដែលបូកចូលគ្នាសរុបមានចំនួន ១៣៣ អាសនៈ ដែលគ្រប់គ្រាន់ល្មមក្នុងការបង្កើតរដ្ឋាភិបាល ខណៈដែលសភាប៉ាគីស្ថានមានអាសនៈសរុបរួមចំនួន ២៦៤អាសនៈ។ 

កន្លងមក ការពន្យារពេលសម្រាប់ការបង្កើតរដ្ឋាភិបាលនៃប្រទេសដែលមានប្រជាជនប្រមាណជា ២៤១លាននាក់នេះ បានបង្កជាការព្រួយបារម្ភ ខណៈដែលប្រទេសប៉ាគីស្ថានកំពុងប្រឈមមុខនឹងវិបត្តិសេដ្ឋកិច្ចដែលមានកំណើនយឺត និងអតិផរណាក្នុងកម្រិតគួរឱ្យព្រួយបារម្ភ៕